ଜାମିଆ ମିଲିଆରେ ସାମ୍ବାଦିକ ଦାନିଶ ସିଦ୍ଦିକୀଙ୍କ ଶେଷକୃତ୍ୟ ସମ୍ପନ୍ନ ହେବ

ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ପହଁଞ୍ଚିଛି ଫଟୋ ସାମ୍ବାଦିକ ଦାନିଶ ସିଦ୍ଦିକୀଙ୍କ ପାର୍ଥିବ ଶରୀର । ଆଫଗାନିସ୍ତାନର ରାଜଧାନୀ କାବୁଲରୁ ଦାନିଶଙ୍କ ମର ଶରୀର ନେଇ ଆସିଥିବା ଏୟାର ଇଣ୍ଡିଆର ବିମାନ ଦିଲ୍ଲୀରେ ପହଁଞ୍ଚିଛି ।

ପୁଲିତ୍‌ଜର ପୁରସ୍କାରରେ ସମ୍ମାନିତ ଫଟୋ ସାମ୍ବାଦିକ ଦାନିଶ ସିଦ୍ଦିକୀଙ୍କୁ ଜାମିଆ ମିଲିଆ ଇସଲାମିଆ ୟୁନିଭର୍ସିଟିର କବରସ୍ତାନରେ କବର ଦିଆଯିବ । ନିଜର ପୂର୍ବତନ ଛାତ୍ର ଦାନିଶଙ୍କୁ ଏଠାରେ ସୁପଦ୍ର-ଏ-ଖାକ(ଶେଷକୃତ୍ୟ ସମ୍ପନ୍ନ) କରିବା ପାଇଁ ଅନୁମତି ଦେଇଛି ୟୁନିଭର୍ସିଟି ପ୍ରଶାସନ ।ମୃତ୍ୟୁ ସାର୍ଟିଫିକେଟ ଅନୁଯାୟୀ, ଗୁଳି ବାଜିବା କାରଣରୁ ଦାନିଶଙ୍କ ମୃତ୍ୟୁ ହୋଇଛି । ତେବେ ଆଫଗାନିସ୍ତାନର ରାଜଧାନୀ କାବୁଲରୁ ଏୟାର ଇଣ୍ଡିଆର ବିମାନ ଯୋଗେଁ ଦାନିଶଙ୍କ ମୃତଦେହ ଦିଲ୍ଲୀ ଅଣାଯାଇଛି ।ଘଟଣା ସମୟରେ ଆଫଗାନିସ୍ତାନ ସୁରକ୍ଷାବଳ ସହିତ ଥିଲେ ଦାନିଶ । ଆଫଗାନିସ୍ତାନର ଯୁଦ୍ଧ ପ୍ରଭାବିତ କାନ୍ଦାହାରରେ କଭରେଜ ସମୟରେ ତାଲିବାନ ଆକ୍ରମଣରେ ହୋଇଥିଲା ଦାନିଶଙ୍କ ମୃତ୍ୟୁ ।

ଜାମିଆ ମିଲିଆ ବିଶ୍ୱବିଦ୍ୟାଳୟର ଛାତ୍ର ଥିଲେ ଦାନିଶ । ତାଙ୍କ ବାପା ଅଖତର ସିଦ୍ଦିକୀ ବିଶ୍ୱବିଦ୍ୟାଳୟର ଶିକ୍ଷା କମିଟିର ଡିନ ଥିଲେ । ଦାନିଶ ୨୦୦୫ରୁ ୨୦୦୭ ପର୍ଯ୍ୟନ୍ତ ଏଜେକେ ମାସ କମ୍ୟୁନିକେଶନ ସେଣ୍ଟରରେ ଶିକ୍ଷା ଗ୍ରହଣ କରିଛନ୍ତି । ଦିଲ୍ଲୀରେ ରହୁଥିବା ଦାନିଶ ସିଦ୍ଦିକୀ କାନ୍ଦାହାର ପ୍ରାନ୍ତ ସ୍ପନ ବୋଲ୍ଡ ଅଞ୍ଚଳରେ ନ୍ୟୁଜ କଭର କରୁଥିବା ସମୟରେ ତାଙ୍କୁ ହତ୍ୟା କରାଯାଇଥିଲା । ଆମେରିକାର ସୈନ୍ୟ ପ୍ରତ୍ୟାହାର ପରେ ଆଫଗାନିସ୍ତାରେ ହିଂସା ଜାରି ରହିଛି । ପୁଲିତ୍‌ଜର ସମ୍ମାନରେ ସମ୍ମାନିତ ସିଦ୍ଦିକୀ ବିଶ୍ୱର ଜଣେ ଜଣାଶୁଣା ଫଟୋ ସାମ୍ବାଦିକ ରୂପେ ପରିଚିତ । ସେ ଏବେ ଅନ୍ତରାଷ୍ଟ୍ରୀୟ ଏଜେନ୍ସି ରଏଟର୍ସରେ କାର୍ଯ୍ୟ କରୁଥିଲେ । ଦାନିଶ ଟିଭି ରିପୋର୍ଟରରୁ ନିଜ କ୍ୟାରିଅର ଆରମ୍ଭ କରି ପରେ ଫଟୋ ସାମ୍ବାଦିକତା କରୁଥିଲେ ।

Leave A Reply

Your email address will not be published.

ବ୍ରେକିଂ